سنه حلوه*الشاعر هشام رضا

الشاعر هشام رضا

(( سنه حلوه ))
=========
سنه حلوه
على كل الناس
مليانه فرح وأنوار
وبلدنا
تتشال ع الراس
دى مصر دى
بلد الأحرار

سنه حلوه
على شيخنا وأبونا
فى كنيسه
وجامع لمونا
لو نمنا
فى مره يصحونا
إيد واحده
فى وش الغدار
سنه حلوه
على إيدين شقيانه
زارع صانع
جُندى حمانا
يخلو بلدنا
فى أعلى مكانه
ويعدو
لآخر المشوار
سنه حلوه
لأستاذ بيعلم
بيربى
أجيال ويفهم
ويخلى
عقولنا تتكلم
وتقول
المصريين شُطار
سنه حلوه
يا جدى وجدتنا
سنه حلوه
يا أهالى حتتنا
سنه حلوه
والضحكه فى بيتنا
تفضل عاليه
ليل ونهار
سنه حلوه
والحُب مالينا
ومتحققه
دايماً أمانينا
وفى العالى
تفضل أسامينا
وأراضينا
تفضل فى عمار.
سنه حلوه
على كل الناس
مليانه
فرح وأنوار
وبلدنا
تتشال ع الراس
دى مصر دى
بلد الأحرار.
هشام رضا