دراع بنتى فين !
""""""""""""""""""
( رجل يقطع ذراع ابنته محاولا انقاذها من الموت بقطار الإسكندرية )
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
صرخة ألم شقت
جبال الهم يابلادى
وفوق أرض المظالم
سال دم أولادى
بنتى ..
اللى كانت ف- حضنى
من نص ساعة بس
شفتها قدامى بتتقطع
ولما صرخت
قالولى ..
يعوض عليك ربنا
بنتك خلاص ماتت
ونسيوا يقولوا
إنى كمان بقيت ميت
وأنا بين العباد
هبقى زى الخيال عايش
أصلى خلاص ما بقاليش
فى دنيا الوبا معايش !
---------------------
مشيت .. وأنا ميت
وبقول لنفسى
أشوف باقى
اللى ماتوا هناك
وهناك ...
ملقتش ليهم جثث
وفوق أرض السواد
كانت مفرمة البشر
دم ولحم متقطع
وجماجم متنطوره هنا وهناك
جف الدمع ف- عنيا
هبكى على إيه ولا إيه
وهبكى إزاى وأنا ميت !
---------------------
يارب ..
ليه كل ده وانت هناك موجود
أنا عارف إنك هناك ..
فوق ..
ف- السما عند النجوم
هجرتنا ..
وسبت أرضنا للبوم
طب بس ليه يارب
وأنا عمرى ما عصيتك
حفظتها القرآن
وياما خدتها بيتك
عرقى ويا عرق أمها
فوق تراب البلد يشهد
ع- الشقا والمرمطة والهوان
لجل لقمة عيش
غموسها من دمنا
يا رب ..
عيشنا الكفاف
حامدينك وشاكرينك
على الرغيف الحاف
ولا اشتكينا
ولا قلنا جلنا جفاف
----------------------
يا رب ..
ليه الشك بيدخلنى
وليه ابليس بيقولى إلهك فين !
............
مش قصدى والله .. ياإله العدل
أصلى أنا يارب ..
خلاص بقيت مجنون !!!
سا محنى على التجديف
وسامحنى ع- التخاريف
...........
مش إنت رحمن
زى مانا عارف
وعادل وقادر
وغافر ذنوب الخطائين
طب خدنى دلوقتى ..
وإوعى تسيبنى
أمشى كما المجانين
...........
يارب أنا خسرت دنياى
فى موت بنتى
أصلى ما عنديش غيرها عيال
خدنى هناك عندك
قبل ما يبقى دخولى
فى رحمتك هو بعينه المحال
-----------------------
أنا مش قادر أعيش يا رب !
قولى إنت أعمل إيه ؟
أنا خايف أغضبك ياغفور
وساعتها تبقى الدنيا لزومها إيه !
............
خدنى النهارده .. دلوقت حالا !!
لأنى مش عارف هعيش إزاى !
خايف لئلا ف- قلبى
تدبل زهرة الايمان
ومين يضمنلى الثبات يارب
وأنا كل لحظة بعيش حالة جنان ؟!
v´¯)
`•.¸.•´
¸.•´¸.•¨) ¸.•¨)
(¸.•´ (¸.•´ (¸.•¨¯`? .
~? محمد ? البكرى ?
ليست هناك تعليقات :
إرسال تعليق