وشوش الناس
***********
للشاعر / محمد عبد الفضيل
************************
وشوش الناس بتتغـير
وتطفح غــــل بسواده
وأنا مش قــادر أتـذكـر
بـيــاض القـلب ووداه
دا كان فرحان ييتمخطر
وشايل م الهوي زاد ه
وحضنه كان يساع أكتر
من ضمـــة أب لآولاده
لـكـــن الــوقــت إتغـيـر
وســاد الـكـره بـعـنـاده
شيطان الحقد بقي أشطر
وزارع كرهه بحــــصاده
لا عادت رقـوه ليه تنفع
ولا تمنع فــــي حساده
فينا شاطر وفيه أشطر
يـكــفـيـنـا شر أسياده
وفي مسكين بيتحسر
مايعرف إيه كده نابه
وفي ظالم إيديه بتطول
وقافل للعباد بابه
قدر يظلم ويتأمر
مفيش رحمه لجنابه
وناس عايشه بتتبعتر
كرامتها علي إعتابه
وأنا حالف ما هتغير
دا وشي وربنا جابه
بيضحك لاجل ما يفكر
ولا يتعب في أعصابه
مسيرها تروق وهتنور
وقلبي يصفي لاحبابه
*********************
للشاعر / محمد عبد الفضيل
ليست هناك تعليقات :
إرسال تعليق