صندوق الدنيا *عزت عبد العال

Ezzat Abdelaal shared his photo.

Ezzat Abdelaal

-- (( صندوق الدنيا )) --
1- اتفرج اتفرج -- اتفرج يا سلام -- بالرؤيا وبالكلام
دنيا وفيها الحكاوى -- من كان وكنا وكان
مظبوط ومساوى --
خُد من الكلام محلاه -- والعهده على الراوى -
---------------
2- اتفرج بالمليم -- لو مصروف ايدك باقى
فتش فى جيوبك حتلاقى -- دا الفرجه تساوى
ولو مفيش ممكن تقبل -- برغيف العيش البتّاوى
ما هو فى القليل بركه -- بسطه وبساطه
ما بين راوى وبين غاوى -
-------------
3- الدنيا على ضهرى -- بحلوها ومرها
بإنسها وجنّها -- وبطولها وبعرضها -- شايلها شيل
مع شد حيل الخطاوى -- من شارع لشوارع
وحاره تودى لحوارى -- صابر ولا كلّيت
ولا اشتكيت
ولا اشتكى من تقل دنيتى ضهرى -
--------------
4 - صندوق الدنيا فى دكانى -- حمّالى نقّالى
والدنيا فى الصندوق
بعجايب الزمان -- جيباه وجيّالى
بحلو المعانى -- والسيره والمسيره
لعنتره العبسى وابو زيد الهلالى -
-------------------
5 - أنا الراوى -- وعشق الفن موّالى
أبيع الكانى والمانى -- حكاوى تجر فى حكاوى
تسرسب للعيال دهشه
فى وش بشوش بلون عجبى
يخلّيهم يباركونى -- يقابلونى
فى حال موصل بدكانى
أبو الحكاوى بتاع زمان
جوّه الصندوق السحراوى ؟؟!!
------------------
عزت عبد العال -- 2008م